“मुख्यमंत्री माझी लाडकी बहीण योजना” – महिलांच्या आर्थिक स्वावलंबनासाठी e-KYC प्रक्रिया अनिवार्य

“मुख्यमंत्री माझी लाडकी बहीण योजना” – महिलांच्या आर्थिक स्वावलंबनासाठी e-KYC प्रक्रिया अनिवार्य

मुंबई प्रतिनिधी (एम. एस. कारंडे)

राज्यातील महिलांचे आर्थिक स्वातंत्र्य, आरोग्य आणि पोषण सुधारण्यासाठी तसेच कुटुंबातील त्यांची निर्णायक भूमिका अधिक मजबूत करण्यासाठी महाराष्ट्र शासनाची महत्वाकांक्षी योजना “मुख्यमंत्री माझी लाडकी बहीण” सुरू करण्यात आली आहे. या योजनेद्वारे महिलांना थेट आर्थिक सहाय्य दिले जाणार असून त्याचा लाभ घेण्यासाठी e-KYC (आधार प्रमाणीकरण) प्रक्रिया पूर्ण करणे अनिवार्य आहे.

महिला व बाल विकास विभागाने ही प्रक्रिया अत्यंत सोपी, सहज व सुलभ ठेवली असून ग्रामीण तसेच शहरी भागातील सर्व पात्र महिलांना मोबाईलवरून किंवा संगणकाच्या साहाय्याने स्वतःच ही प्रक्रिया पूर्ण करता येणार आहे.

e-KYC करण्याची प्रक्रिया:

1. आपल्या मोबाईल किंवा संगणकावर https://ladakibahin.maharashtra.gov.in या संकेतस्थळाला भेट द्या.
2. संकेतस्थळावर “e-KYC” हा पर्याय निवडा.
3. आपला आधार क्रमांक प्रविष्ट करून प्रमाणीकरणाची प्रक्रिया सुरू करा.
4. मोबाईलवर आलेल्या OTP द्वारे नोंदणीची खातरजमा करा.
5. प्रक्रिया पूर्ण झाल्यानंतर आपल्या बँक खात्यात थेट लाभ जमा होईल.

या योजनेतून पात्र महिलांना Direct Benefit Transfer (DBT) च्या माध्यमातून आर्थिक सहाय्य दिले जाणार आहे. शासनाने पारदर्शकता व वेळेवर लाभ पोहोचवण्यासाठी डिजिटल प्रणालीचा अवलंब केला आहे.

गावोगावी महिलांना या योजनेची माहिती देण्यासाठी जनजागृती कार्यक्रम राबवले जात आहेत. ग्रामपंचायत, आशा स्वयंसेविका, महिला बचत गट यांच्या माध्यमातून महिलांना e-KYC प्रक्रियेबाबत मार्गदर्शन केले जात आहे.

शासनाकडून आवाहन करण्यात आले आहे की, सर्व पात्र महिलांनी वेळेत e-KYC प्रक्रिया पूर्ण करून आपला हक्काचा लाभ घ्यावा. ही योजना महिलांच्या आर्थिक स्वावलंबनाबरोबरच आरोग्यदायी आणि सक्षम कुटुंब घडविण्यासाठी महत्त्वाची ठरणार आहे.

---