महाबळेश्वर तालुक्यात विमुक्त जाती व भटक्या जमातींसाठी विशेष मोहीम सुरू
महाबळेश्वर प्रतिनिधी (राजेश सोंडकर):
इतर मागास बहुजन कल्याण विभाग, मुंबई यांच्या २८ ऑगस्ट २०२५ रोजीच्या शासन निर्णयानुसार, विमुक्त जाती आणि भटक्या जमाती (VJNT) प्रवर्गातील पात्र नागरिकांना ओळखपत्रे, जात प्रमाणपत्रे तसेच विविध शासकीय योजनांचा लाभ मिळवून देण्यासाठी महाबळेश्वर तालुक्यात विशेष मोहीम हाती घेण्यात आली आहे.
या पार्श्वभूमीवर १२ सप्टेंबर २०२५ रोजी महाबळेश्वर तालुकास्तरीय समिती सदस्य आणि क्षेत्रीय अधिकारी-कर्मचारी यांची महत्त्वपूर्ण बैठक तहसील कार्यालयात घेण्यात आली. या बैठकीत तहसीलदार श्री. सचिन मस्के यांनी सर्व संबंधित विभागातील अधिकारी व कर्मचाऱ्यांना आवश्यक दिशा-निर्देश दिले.
बैठकीत तहसीलदारांनी तालुक्यातील सर्व VJNT समाजातील पात्र लाभार्थ्यांची माहिती तातडीने संकलित करण्याचे आदेश दिले. पुढील पंधरा दिवसांमध्ये विशेष शिबिरे घेऊन नागरिकांकडून आवश्यक कागदपत्रे गोळा करण्याची व त्यांना तत्काळ सरकारी योजनांचा लाभ मिळवून देण्याची कार्यवाही करण्यावर भर देण्यात आला.
📌 या शिबिरांसाठी आवश्यक कागदपत्रे
लाभार्थ्यांना आधार कार्ड, मतदान ओळखपत्र, शिधापत्रिका, जात प्रमाणपत्र, आयुष्मान भारत कार्ड, उत्पन्न दाखला, नॉन-क्रिमीलेअर प्रमाणपत्र, रहिवास प्रमाणपत्र, अधिवास दाखला, विवाह नोंदणी प्रमाणपत्र इत्यादी कागदपत्रे ग्राम महसूल अधिकारी, ग्राम विकास अधिकारी किंवा महसूल सेवक यांच्याकडे जमा करणे आवश्यक राहील.
📌 योजनांचा लाभ
या शिबिरांमध्ये VJNT समाजातील नागरिकांना खालील योजनांचा लाभ मिळणार आहे :
- संजय गांधी निराधार योजना
- श्रावण बाळ अर्थसहाय्य योजना
- लाडकी बहीण योजना
- प्रधानमंत्री आवास योजना
- ॲग्रोस्टॅक योजनेअंतर्गत फार्मर आयडी
- तसेच इतर सर्व संबंधित शासकीय योजना
तहसीलदार श्री. मस्के यांनी सांगितले की, "VJNT समाजातील सर्व पात्र लाभार्थ्यांनी या शिबिरांमध्ये मोठ्या संख्येने सहभागी होऊन शासनाच्या योजनांचा लाभ घ्यावा. ही मोहीम समाजाला विकासाच्या मुख्य प्रवाहात आणण्यासाठी एक महत्त्वाचे पाऊल ठरेल."
या विशेष मोहिमेमुळे महाबळेश्वर तालुक्यातील विमुक्त जाती आणि भटक्या जमातींना शासकीय योजनांची थेट दारे खुली होणार असून, त्यांच्या सामाजिक-आर्थिक विकासाला गती मिळण्याची अपेक्षा आहे.
Comments
Post a Comment