कुंभरोशी–प्रतापगड रस्त्याची दुरावस्था; प्रशासनाचे दुर्लक्ष, पर्यटक व भाविक त्रस्त

कुंभरोशी–प्रतापगड रस्त्याची दुरावस्था; प्रशासनाचे दुर्लक्ष, पर्यटक व भाविक त्रस्त

प्रतापगड प्रतिनिधी ( जितेंद्र कारंडे)

जागतिक वारसा स्थळाचा दर्जा मिळालेल्या प्रतापगड किल्ल्याकडे जाणारा कुंभरोशी–प्रतापगड रस्ता सध्या अत्यंत दुरावस्थेत असून स्थानिक नागरिकांसह देश-विदेशातून येणाऱ्या पर्यटकांमध्ये नाराजीचे वातावरण निर्माण झाले आहे. "जागतिक वारसा स्थळाला भेट देतो आहोत की एखाद्या दुर्लक्षित ठिकाणी?" असा प्रश्न अनेक पर्यटक उपस्थित करत आहेत.

छत्रपती शिवाजी महाराजांनी अफजलखानाचा वध करून शौर्याचा ऐतिहासिक अध्याय लिहिलेल्या या गडाला दरवर्षी हजारो देशी-विदेशी पर्यटक भेट देतात. मात्र, खड्ड्यांनी व डांबर उखडलेल्या रस्त्यामुळे प्रवास त्रासदायक होत आहे. वाहनांचे नुकसान होणे, अपघातांची शक्यता वाढणे आणि विशेषतः पावसाळ्यात चिखल व घसरणीमुळे पर्यटकांचे हाल होत आहेत.

दरम्यान, लवकरच सुरू होणाऱ्या नवरात्र उत्सवाच्या पार्श्वभूमीवर ही समस्या आणखी गंभीर होणार आहे. प्रतापगडावरील भवानी मातेच्या मंदिरात दरवर्षी नवरात्र मोठ्या जल्लोषात साजरी केली जाते. या उत्सवाला लाखो भाविक गर्दी करतात. मात्र, रस्त्याची दुर्दशा लक्षात घेता भाविकांच्या सुरक्षेचा आणि सोयीसुविधांचा प्रश्न अधिकच तीव्र झाला आहे.

स्थानिक नागरिकांनी वारंवार निवेदन देऊन रस्त्याच्या दुरुस्तीची मागणी केली आहे. पर्यटन विकासासाठी कोट्यवधींची तरतूद करण्यात येते, मात्र त्याचा फायदा प्रत्यक्षात गडाकडे जाणाऱ्या रस्त्याच्या कामात होत नाही, अशी टीका ग्रामस्थांनी केली आहे.

पर्यटन विभाग, सार्वजनिक बांधकाम विभाग आणि स्थानिक प्रशासनाने तातडीने लक्ष घालून रस्त्याची डागडुजी व मजबुतीकरणाची कामे हाती घेणे आवश्यक असल्याचे नागरिकांचे मत आहे. अन्यथा नवरात्र उत्सवात भाविकांची गैरसोय होईलच, शिवाय प्रतापगडाच्या जागतिक वारसा स्थळाच्या प्रतिमेलाही तडा जाईल.

👉 स्थानिकांच्या अपेक्षा स्पष्ट आहेत –

• तातडीची डागडुजी व खड्डे बुजवणे
• नवरात्रपूर्वी वाहतुकीस योग्य स्थिती निर्माण करणे
• दीर्घकालीन रस्ता मजबुतीकरण योजना राबवणे

प्रशासनाने तातडीने दखल घेतली नाही, तर भाविक-पर्यटकांचा संताप तीव्र होईल, असा इशारा स्थानिक संघटनांनी दिला आहे.