आंबेनळी घाटात थरारक अपघात – जीवितहानी टळली, तासभर वाहतूक ठप्प!

आंबेनळी घाटात थरारक अपघात – जीवितहानी टळली, तासभर वाहतूक ठप्प!

प्रतापगड प्रतिनिधी (अमित जाधव):

महाबळेश्वर–पोलादपूर या जीवघेण्या घाटरस्त्यावर सोमवारी दुपारी साडेचारच्या सुमारास चिरेखिंड गावानजीक थरारक अपघात घडला. दोन चारचाकी वाहनांची समोरासमोर धडक होऊन मोठा आवाज होताच परिसर हादरला. क्षणभर तरी मोठी दुर्घटना घडली, अशी भीती निर्माण झाली होती. मात्र सुदैवाने यात कोणतीही जीवितहानी झाली नाही.

घटनेत एमएच 07 एबी 0087 क्रमांकाची स्विफ्ट डिझायर गाडी महाबळेश्वरहून पोलादपूरकडे वेगाने येत असताना समोरून येणाऱ्या एमएच 12 केवाय क्रमांकाच्या इकोस्पोर्ट गाडीचा चालक वळण घेताना गाडीवरचा ताबा गमावून बसला. काही कळायच्या आत स्विफ्ट डिझायरवर जोरदार धडक बसली.

या भीषण धडकेत दोन्ही वाहनांचे मोठे नुकसान झाले. सुदैवाने गाड्यांतील प्रवाशांना कोणतीही दुखापत झाली नाही. पण अपघातानंतर रस्त्यावर तासाभर मोठा ट्रॅफिक जॅम झाला. रांगेत उभ्या वाहनांमुळे प्रवासी आणि पर्यटक हैराण झाले.

घटनेची माहिती मिळताच पोलादपूर पोलीस स्टेशनची पथकं तातडीने घटनास्थळी दाखल झाली. पोलिसांनी वाहने बाजूला करून वाहतूक सुरळीत केली आणि अपघाताचा पंचनामा करून पुढील तपास सुरू केला आहे.

👉 आंबेनळी घाटातील धोकादायक वळणे आणि घसरणारे रस्ते यामुळे अपघाताचे प्रमाण दिवसेंदिवस वाढत चालले आहे. स्थानिकांच्या मते, घाटरस्त्यावर वाहतुकीचे काटेकोर नियमन आणि सतत देखरेख नसल्याने अशा घटना घडत आहेत. पर्यटक व वाहनचालकांनी घाटात सावधगिरीने वाहन चालवण्याचे आवाहन पोलीस प्रशासनाकडून करण्यात आले आहे.

---