खटाव तालुक्यात एरळा नदीच्या पुलावरून व्यक्ती पुराच्या पाण्यात वाहून; घटना कॅमेऱ्यात कैद

खटाव तालुक्यात एरळा नदीच्या पुलावरून व्यक्ती पुराच्या पाण्यात वाहून; घटना कॅमेऱ्यात कैद

खटाव प्रतिनिधी : 

सातारा जिल्ह्यात सुरू असलेल्या मुसळधार पावसामुळे नद्या-ओढ्यांना पूर आला असून नदीपात्रांतील पाण्याची पातळी धोक्याच्या पातळीवर पोहोचली आहे. अशातच खटाव तालुक्यातील अंबवडे–गोरेगाव रस्त्यावर असलेल्या एरळा नदीच्या पुलावरून एक व्यक्ती वाहून गेल्याची धक्कादायक घटना  घडली. ही घटना उपस्थित ग्रामस्थांनी आपल्या मोबाईल कॅमेऱ्यात कैद केली असून परिसरात खळबळ उडाली आहे.

घटनेचा तपशील

मिळालेल्या माहितीनुसार, अंबवडे–गोरेगाव रस्त्यावरील पुलावरून जोरात पाणी वाहत होते. तरीदेखील एका व्यक्तीने पुल ओलांडण्याचा प्रयत्न केला. मात्र, प्रचंड वेगाने येणाऱ्या पाण्याचा अंदाज न आल्याने ती व्यक्ती पुराच्या लाटेत वाहून गेली.
वाहून गेलेल्या व्यक्तीचे नाव सुरेश रघुनाथ गायकवाड (रा. अंबवडे) असे समोर आले आहे.

प्रशासनाची धावपळ

घटनेची माहिती मिळताच पोलिस, तलाठी, पोलीस पाटील तसेच शासकीय यंत्रणा तात्काळ घटनास्थळी दाखल झाली. पाण्यात वाहून गेलेल्या व्यक्तीचा शोध घेण्यासाठी स्थानिक ग्रामस्थांच्या मदतीने प्रयत्न सुरू करण्यात आले आहेत.

गावकऱ्यांच्या प्रतिक्रिया

ग्रामस्थांनी सांगितले की, पुलावरून पाणी प्रचंड वेगाने जात असतानाही सुरेश गायकवाड यांनी तो रस्ता ओलांडण्याचा प्रयत्न केला. काही क्षणांतच ते पाण्यात वाहून गेले. या संपूर्ण घटनेचे दृश्य घटनास्थळी असलेल्या ग्रामस्थांच्या मोबाईल कॅमेऱ्यात कैद झाले असून, त्याचा व्हिडिओ सोशल मीडियावर व्हायरल होत आहे.

प्रशासनाची विनंती

दरम्यान, प्रशासनाने नागरिकांना आवाहन केले आहे की, पावसाळ्यात नदी-ओढ्यांना पूर आल्यावर धोका पत्करून पुल किंवा पाण्याने भरलेले रस्ते ओलांडू नयेत. सुरक्षिततेस प्राधान्य द्यावे, असे आवाहन करण्यात आले आहे.