रायगड पोलीस अधिक्षक ऑंचल दलाल यांची पोलादपूरला ‘सरप्राईज व्हिजिट’शाळकरी मुलांवरील अत्याचार टाळण्यासाठी जागरूकतेचे आवाहन

पोलादपूर प्रतिनिधी (प्रकाश कदम)

पोलादपूर पोलीस ठाण्यात रायगड जिल्ह्याच्या पोलीस अधिक्षक आयपीएस ऑंचल दलाल यांनी अनपेक्षित भेट देऊन पोलिसांचे मनोबल उंचावले. त्यांच्या या भेटीत सर्वाधिक चर्चेत राहिला तो प्रत्येक पोलीस कर्मचाऱ्याच्या नावाने एक झाड लावण्याचा अभिनव उपक्रम. पर्यावरण संवर्धनासोबतच पोलिसांच्या सेवेला कायमस्वरूपी स्मरणात ठेवणारा हा प्रयोग पोलादपूर ठाण्याने उत्साहात राबवला.

गणेशदर्शनानंतर पोलिसांशी थेट संवाद

भेटीदरम्यान अधिक्षक ऑंचल दलाल यांनी ठाण्यातील श्रीगणेशाचे दर्शन घेतले. त्यानंतर पोलिसांशी थेट संवाद साधत गुन्हेगारी नियंत्रण, तपासाची तत्परता व न्यायालयापर्यंत पोहोचविण्याची जबाबदारी यावर भर दिला. विशेषतः शाळकरी मुले व मुलींवरील वाढत्या अत्याचारांच्या पार्श्वभूमीवर पोलिसांनी शाळांशी नियमित संपर्क ठेवून प्रतिबंधात्मक कार्य हाती घ्यावे, असे त्यांनी स्पष्ट शब्दांत सांगितले.

वृक्षारोपण — सेवेला मानाचा मुजरा

पोलिस अधिक्षकांच्या सूचनेनुसार पोलादपूर पोलीस ठाण्याच्या आवारात वृक्षारोपण करण्यात आले. प्रत्येक झाडाला एका पोलीस कर्मचाऱ्याचे नाव देण्यात आले आहे. त्यामुळे ठाण्यात येणाऱ्या नागरिकांना “ही झाडे म्हणजे पोलिसांच्या सेवाकाळाची आठवण” असे भासेल. पोलिस सेवेला दिलेला हा अनोखा सन्मान सर्वत्र कौतुकाचा विषय ठरला आहे.

अंमली पदार्थ व खुनाच्या तपासाची दखल

सहायक पोलीस निरीक्षक आनंद रावडे यांनी यापूर्वी महाड एमआयडीसीतील अंमली पदार्थ प्रकरण तसेच बेवारस मृतदेह व खुनाच्या गुन्ह्याचा तपास यशस्वीरीत्या पूर्ण केला होता. त्या कार्याची दखल घेत पोलीस अधिक्षक दलाल यांनी त्यांचा अलिबाग येथे सत्कार केला होता. त्या पार्श्वभूमीवर गणेशोत्सवाच्या दिवसांत झालेली ही भेट पोलादपूर पोलीसांसाठी प्रेरणादायी ठरली.

महिला पोलीस व कर्मचारी वर्गात उत्साहाचे वातावरण

या भेटीत महाड उपविभागीय पोलीस अधिकारी शंकर काळेही उपस्थित होते. गणेशोत्सवाच्या पार्श्वभूमीवर महिला पोलीस व इतर कर्मचारी वर्गात विशेष उत्साहाचे वातावरण दिसून आले. दलाल यांच्या नेतृत्वामुळे पोलिसांमध्ये शिस्त, जबाबदारीसोबत सामाजिक भान व पर्यावरणाची जाणीवही दृढ होत असल्याची भावना नागरिकांतून व्यक्त होत आहे.

 या सरप्राईज व्हिजिटमुळे पोलादपूर पोलीस ठाण्याला नवसंजीवनी लाभली असून, “शिस्तीबरोबर संवेदनशीलता” हे पोलीस दलाचे ब्रीद अधोरेखित झाल्याची प्रतिक्रिया स्थानिक पातळीवर उमटत आहे.