सातारा येथे मराठा समाजाकडून छत्रपती शिवेंद्रराजे भोसले यांचा गौरव

सातारा प्रतिनिधी :

 मराठा आरक्षणासाठी सातत्याने ठाम भूमिका घेऊन समाजासाठी केलेल्या योगदानाबद्दल माननीय नामदार छत्रपती शिवेंद्रराजे भोसले यांचा सातारा येथे मराठा समाजाच्या वतीने विशेष सन्मान करण्यात आला. या कार्यक्रमाला सातारा जिल्हा भाजप अध्यक्ष आमदार अतुल बाबा भोसले यांच्यासह अनेक मान्यवर उपस्थित होते.

कार्यक्रमात विविध मान्यवरांनी आपली मते व्यक्त करताना शिवेंद्रराजे यांच्या कार्याची प्रशंसा केली.  वक्त्यांनी नमूद केले की, शिवेंद्रराजे हे फक्त नेते म्हणूनच नव्हे तर मंत्री म्हणूनही समाजाच्या पाठीशी ठामपणे उभे राहिले. त्यांनी दिलेला शब्द कृतीत उतरवून दाखवला, हा समाजासाठी विश्वासार्हतेचा मोठा आधार असल्याचे मत व्यक्त करण्यात आले.

एका वक्त्याने राजघराण्याच्या इतर सदस्यांचा उल्लेख करताना, त्यांनी पूर्वी अनेक आंदोलनांमध्ये सहभाग घेतल्याचे सांगितले आणि त्यांच्या योगदानाची नोंद घेतली.

यावेळी  मुख्यमंत्री देवेंद्र फडणवीस यांच्या कार्याचाही विशेष उल्लेख झाला. त्यांनी दुसऱ्यांदा मराठा समाजाला आरक्षण मिळवून दिले आहे आणि त्याची कायदेशीर बाजू मजबूत केली आहे, असे सांगण्यात आले. मात्र, मागील आरक्षण महाविकास आघाडी सरकारच्या काळात सर्वोच्च न्यायालयाने रद्द केले, यावरही भाष्य झाले.

नुकतेच जरांगे पाटील यांच्या आंदोलनाचा संदर्भ देत सध्याचे मुख्यमंत्री  देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांनी समाजाला न्याय देण्यासाठी घेतलेल्या निर्णयांवर विश्वास व्यक्त करण्यात आला. तसेच, दिलेल्या आश्वासनानुसार एका महिन्याच्या आत सातारा गॅझेटसह आवश्यक गॅझेट लागू करण्यासाठी ठोस पावले उचलली जातील, असेही स्पष्ट करण्यात आले.

यावेळी ओबीसी समाजालाही आश्वस्त करण्यात आले की, मराठा आरक्षणामुळे त्यांच्या हक्कांवर कोणताही परिणाम होणार नाही. मुख्यमंत्री देवेंद्र फडणवीस यांनी स्वतः हमी दिल्याचे नमूद करण्यात आले.

या सन्मान सोहळ्याच्या माध्यमातून मराठा समाजातील एकात्मता, शिवेंद्रराजेंची समाजाशी असलेली जवळीक आणि सरकारची वचनबद्धता यांचा ठसा उमटला.

---