वाई-खंडाळा-महाबळेश्वर मतदारसंघात ‘नमो उद्यान’ योजनेची मोठी भेट; प्रत्येक नगरपरिषदेला १ कोटींचा निधी

वाई-खंडाळा-महाबळेश्वर मतदारसंघात ‘नमो उद्यान’ योजनेची मोठी भेट; प्रत्येक नगरपरिषदेला १ कोटींचा निधी

प्रतापगड प्रतिनिधी (जितेंद्र कारंडे): 

वाई-खंडाळा-महाबळेश्वर विधानसभा मतदारसंघातील नागरिकांसाठी राज्य सरकारकडून आनंदाची बातमी समोर आली आहे. राज्याचे मंत्री मकरंद पाटील यांच्या विशेष प्रयत्नांमुळे मतदारसंघातील वाई, महाबळेश्वर, पाचगणी, खंडाळा आणि लोणंद या नगरपरिषद व नगरपंचायतींना 'नमो उद्यान' योजनेअंतर्गत प्रत्येकी १ कोटी रुपये असा एकूण ५ कोटी रुपयांचा निधी मंजूर झाला आहे. या योजनेमुळे आगामी काळात या परिसराचा चेहरामोहरा बदलणार आहे.

‘नमो उद्यान’ प्रकल्पांतर्गत विकसित होणाऱ्या उद्यानांमध्ये लहान मुलांसाठी आधुनिक खेळणी, ज्येष्ठ नागरिकांसाठी खास बैठक व्यवस्था, जॉगिंग ट्रॅक, योगा झोन, ओपन जिम आणि आकर्षक हरित पट्ट्यांची निर्मिती केली जाणार आहे. विविध प्रकारच्या झाडांची लागवड करून परिसरात ‘ग्रीन कव्हर’ वाढविण्याला प्राधान्य दिले जाणार आहे. यामुळे हवेची गुणवत्ता सुधारेल, प्रदूषण नियंत्रणात येईल आणि नागरिकांना आरोग्यदायी वातावरण लाभेल.

ही उद्याने केवळ मनोरंजनाचे केंद्र नसून सामाजिक, सांस्कृतिक आणि कौटुंबिक संवादासाठी एक महत्त्वाचा केंद्रबिंदू ठरणार आहेत. वाढत्या शहरीकरणात हिरवाईची आणि खुल्या जागेची कमतरता जाणवत असताना या प्रकल्पामुळे नागरिकांना ताणतणावमुक्त जीवनशैलीसाठी एक नवा पर्याय मिळणार आहे.

मंत्री मकरंद पाटील यांचा पुढाकार

या निधीच्या मंजुरीसाठी मंत्री मकरंद पाटील यांनी सातत्याने पाठपुरावा केला. आपल्या मतदारसंघातील नागरिकांसाठी आरोग्यदायी आणि आनंदी वातावरण निर्माण करणे हेच प्राधान्य असल्याचे त्यांनी स्पष्ट केले. पाटील म्हणाले,
“नमो उद्यान ही फक्त एक योजना नाही, तर शहरांना अधिक सुंदर, स्वच्छ आणि निरोगी बनवण्याची संधी आहे. या उपक्रमामुळे आपल्या भागामध्ये हरित क्रांती घडेल आणि नागरिकांना त्याचा थेट फायदा होईल.”

नागरिकांचा उत्साह आणि स्वागत

या महत्त्वपूर्ण योजनेच्या घोषणेनंतर मतदारसंघातील शहरांमध्ये आनंदाचे वातावरण आहे. स्थानिक नागरिक, सामाजिक संस्था आणि पर्यावरणप्रेमी यांनी या निर्णयाचे स्वागत केले आहे. परिसरातील पर्यटन शहरांसह ग्रामीण भागालाही या उद्यानांचा लाभ होईल, अशी अपेक्षा व्यक्त करण्यात येत आहे.

हरित विकासाची नवी पायरी

नमो उद्यान योजना केवळ शहरांचे सौंदर्य वाढवणार नाही, तर पर्यावरण संवर्धन, नागरिकांचे आरोग्य आणि सामाजिक सलोखा वाढविण्याची दिशा दाखवणारी योजना ठरणार आहे. वाई-खंडाळा-महाबळेश्वर परिसरातील नागरिकांसाठी ही योजना खऱ्या अर्थाने हरित उपक्रमाची मोठी पाऊलवाट मानली जात आहे.

---