“दुर्गम भागातील विद्यार्थ्यांसाठी आदर्श उपक्रम — आदिशक्ती युवा प्रतिष्ठान पारसोंडतर्फे शिरवली हायस्कूलमध्ये शैक्षणिक साहित्य वाटप”

 शाळेचे ऋण फेडण्याचा प्रयत्न; विद्यार्थ्यांच्या प्रगतीसाठी प्रतिष्ठानचे योगदान कौतुकास्पद

शिरवली (प्रतिनिधी):

दुर्गम भागातील विद्यार्थ्यांच्या शैक्षणिक प्रगतीसाठी, आदिशक्ती युवा प्रतिष्ठान पारसोंड यांच्या वतीने शिरवली हायस्कूल येथे शैक्षणिक साहित्य वाटप कार्यक्रम आयोजित करण्यात आला. या उपक्रमात विद्यार्थ्यांना वह्या व लेखन साहित्य प्रदान करण्यात आले.

सभासद संदेश सुरेश सोंडकर यांच्या माध्यमातून तब्बल ४० डझन वह्या आणि विविध लेखन साहित्य उपलब्ध करून देण्यात आले. यामुळे विद्यार्थ्यांना शैक्षणिक साधनांची मोठी मदत मिळाली आहे.

 शिरवली हायस्कूल – दुर्गम भागातील ज्ञानदीप

कोयना खोरे विकास मंडळामार्फत चालवली जाणारी ही शाळा अतिशय दुर्गम भागात असून, अनेक विद्यार्थ्यांना येथे शिक्षणाची संधी मिळते.

या शाळेबद्दल बोलताना संजय सोंडकर यांनी सांगितले,

“शिरवली हायस्कूलने आमच्यासारख्या अनेकांना शिक्षण दिलं, घडवलं. या शाळेचे आम्ही ऋणी आहोत. त्या ऋणाची परतफेड करण्यासाठी आणि विद्यार्थ्यांना अधिक चांगल्या सुविधा मिळाव्यात म्हणून  शक्य तेवढी विद्यार्थ्यांना मदत करण्याचा करण्याचा प्रयत्न करत आहोत.”

-मान्यवरांची उपस्थिती आणि प्रेरणादायी विचार

या कार्यक्रमाला श्री. चंद्रकांत मोरे (अध्यक्ष, कोयना खोरे विकास मंडळ) प्रमुख पाहुणे म्हणून उपस्थित होते.

तसेच संस्था प्रतिनिधी बाबुराव मोरे, पर्यवेक्षक विश्वनाथ मोरे, सचिव शिवाजी मोरे, प्रतिष्ठान अध्यक्ष किरण सोंडकर, पोलिस पाटील नितिन सोंडकर, राजेश सोंडकर, अरुण सोंडकर, वैभव सोंडकर, आनंद सोंडकर, राज म्हामुणकर, आरोग्य सहाय्यक श्री. अतुल जगदाळे यांची उपस्थिती लाभली.

किरण सोंडकर (अध्यक्ष, आदिशक्ती युवा प्रतिष्ठान) यांनी विद्यार्थ्यांना मार्गदर्शन करत सांगितले की, “शिक्षण हीच खरी ताकद आहे. ग्रामीण भागातील प्रत्येक विद्यार्थ्यापर्यंत शैक्षणिक साधनं पोहोचावीत, हेच आमचे ध्येय आहे.”

चंद्रकांत मोरे यांनी शाळेच्या कार्याचा आढावा घेत विद्यार्थ्यांना जिद्दीने शिक्षण घेण्याचे आवाहन केले.

शाळेचे मुख्याध्यापक कासुर्डे सर यांनी विद्यार्थ्यांच्या वतीने आदिशक्ती युवा प्रतिष्ठानचे आभार मानले. त्यांनी सांगितले की, शैक्षणिक साहित्याबरोबरच शाळेच्या सोयीसुविधा सुधारण्यासाठी होत असलेले प्रयत्न विद्यार्थ्यांसाठी अत्यंत उपयुक्त ठरतील.

आदिशक्ती युवा प्रतिष्ठान पारसोंड यांचा हा उपक्रम केवळ शैक्षणिक मदतीपुरता मर्यादित नसून, शाळेच्या ऋणाची परतफेड करण्याचा आणि पुढील पिढ्यांसाठी अधिक चांगले वातावरण निर्माण करण्याचा संकल्प आहे. त्यामुळे विद्यार्थ्यांसाठी हा उपक्रम प्रेरणादायी ठरत असून, परिसरातही सकारात्मक ऊर्जेचा संदेश देत आहे.