📰 आंबेनळी घाटातील खड्ड्यांवर “माझं गाव माझी बातमी”चा इम्पॅक्ट : प्रशासनाकडून तात्काळ खड्डे दुरुस्ती

📰 आंबेनळी घाटातील खड्ड्यांवर “माझं गाव माझी बातमी”चा इम्पॅक्ट : प्रशासनाकडून तात्काळ खड्डे दुरुस्ती

महाबळेश्वर प्रतिनिधी (जितेंद्र करांडे)

महाबळेश्वर–प्रतापगड दरम्यानच्या आंबेनळी घाटातील रस्त्यावरील खड्ड्यांमुळे पर्यटकांचे व स्थानिकांचे जीव धोक्यात आले होते. "माझं गाव माझी बातमी – महाबळेश्वर" या स्थानिक वृत्तमाध्यमाने दिनांक ९ सप्टेंबर २०२५ रोजी "आंबेनळी घाटातील खड्ड्यांना झेंडा : प्रशासन व मंत्र्यांना जनतेची चपराक!" अशी ठळक बातमी प्रसिद्ध केली होती.

या वृत्ताला मिळालेल्या जबरदस्त प्रतिसादानंतर प्रशासनाने तत्काळ दखल घेत घाटातील धोकादायक खड्डे भरण्याचे काम सुरू केले. केवळ काही दिवसांतच रस्त्याची डागडुजी करण्यात आल्याने पर्यटक व स्थानिक नागरिकांनी सुटकेचा निश्वास टाकला आहे.

स्थानिक नागरिकांच्या मते, "प्रशासनाला जाब विचारणाऱ्या या बातमीमुळेच तातडीने कामाला गती मिळाली."

महाबळेश्वर हे जागतिक दर्जाचे पर्यटनस्थळ आणि प्रतापगड हा युनेस्को वारसा स्थळ असल्याने या घाटमार्गावरून दररोज हजारो पर्यटक प्रवास करतात. अशा परिस्थितीत खड्ड्यांमुळे जीवघेणे अपघात होण्याचा धोका वाढला होता. याबाबत नागरिकांनी खड्ड्यात झेंडे रोवून प्रशासनाचे लक्ष वेधले होते.

अखेर माध्यमांतून लोकांचा आवाज बुलंद झाल्यानंतर प्रशासन हरकत न घेता सक्रिय झाले व डांबरीकरण करून खड्डे बुजवण्यात आले.

पर्यटक व स्थानिकांनी या कामाचे स्वागत केले असून, “माझं गाव माझी बातमी”ने लोकांचा प्रश्न शासनापर्यंत पोचवला व तातडीने तोडगा निघाला, हीच खरी लोकशाही!” अशी भावना व्यक्त केली.

 पुढेही असेच जनतेचे प्रश्न प्रकाशझोतात आणून त्यावर ठोस पावले उचलली जातील, अशी अपेक्षा व्यक्त होत आहे.

---