प्रतापगडावरील शारदीय नवरात्र उत्सव भव्यदिव्य वातावरणात साजरा

प्रतापगडावरील शारदीय नवरात्र उत्सव भव्यदिव्य वातावरणात साजरा

अमित जाधव

प्रतापगड, प्रतिनिधी :

शिवभक्ती, भवानीमातेची आराधना आणि छत्रपती शिवाजी महाराजांच्या पराक्रमाचा जागर अशा भक्ती-पराक्रमाच्या संगमाने सजलेला प्रतापगडावरील शारदीय नवरात्र उत्सव यंदाही मोठ्या भक्तिभावात व उत्साहात साजरा होत आहे. शिवशाहीर बाबासाहेब पुरंदरे यांनी 1971 साली सुरू केलेल्या या परंपरेला यंदा 54 वर्षे पूर्ण झाली असून, हजारो शिवभक्तांच्या सहभागामुळे गडाचा परिसर दणाणून गेला.

चतुर्थीच्या रात्री गोंधळ-जागर

उत्सवाची सुरुवात चतुर्थीच्या रात्री भवानी आईचा गोंधळ व जागर या पारंपरिक सोहळ्याने झाली. रात्री उशिरापर्यंत गडावर ढोल-ताशांचा निनाद, पारंपरिक गाणी आणि जागरातील भक्तिपूर्ण शब्दांनी वातावरण भारावले होते. "जय भवानी, जय शिवराय"च्या घोषणा अखंड घुमत राहिल्या. भक्तांनी रात्रभर गडावर जागरण करून भवानीमातेचे स्मरण केले.

पंचमीला पहाटे अभिषेक

ललित पंचमीच्या पहाटे भवानी आईचा महाअभिषेक मोठ्या भक्तिभावात पार पडला. शेकडो शिवभक्तांनी अभिषेक विधीत सहभागी होऊन भवानी मातेचे आशीर्वाद घेतले. अभिषेकाच्या मंत्रोच्चारांमुळे गडाभोवती पवित्रतेचे वलय निर्माण झाले होते.

रणरागिणींच्या हस्ते ध्वजारोहण

अभिषेकानंतर भवानी मंदिरात ध्वजारोहणाचा सोहळा पार पडला. विशेष म्हणजे, हा मान दरवर्षीप्रमाणे रणरागिणी महिलांच्या हस्ते संपन्न झाला. भगव्या ध्वजासमोर हजारो शिवभक्तांनी "जय भवानी, जय शिवराय"च्या गजरात सहभाग नोंदविला. महिलांच्या या सहभागामुळे उत्सवाला विशेष प्रेरणादायी छटा लाभली.

भवानी पालखी मिरवणूक – गड दणाणला

ध्वजारोहणानंतर भवानी मातेची पालखी मिरवणूक भवानी मंदिरापासून छत्रपती शिवाजी महाराजांच्या पुतळ्यापर्यंत काढण्यात आली. ढोल-ताशांचा गजर, लेझीम पथकांचे सादरीकरण आणि भगव्या ध्वजांच्या दिमाखदार लहरींनी प्रतापगडाचा परिसर दणाणून गेला. पालखी मार्गावर शिवभक्तांच्या जयघोषांनी उत्सवाची शोभा अधिक वाढली.

शिवभक्तांचा उत्स्फूर्त सहभाग

या संपूर्ण सोहळ्याला महाराष्ट्रासह देशभरातून आलेल्या हजारो शिवभक्तांनी उपस्थित राहून उत्स्फूर्त प्रतिसाद दिला. गडाचा प्रत्येक कोपरा भगव्या रंगात न्हाऊन निघाला होता. भक्ती, पराक्रम आणि संस्कृतीचा अनोखा संगम अनुभवण्यासाठी सर्वत्र भाविकांची गर्दी उसळली.

प्रतापगडावरील शारदीय नवरात्र उत्सव हा केवळ धार्मिक सोहळा नाही, तर तो शिवसंस्कृतीचा जागर व पराक्रमाचा स्मरणोत्सव आहे. सन 1971 पासून आजवर अखंड सुरू असलेली ही परंपरा यावर्षीही भक्तिभावाने उजाळली आहे.

---