सातारा जिल्ह्यातील निवासी क्रीडा प्रशिक्षण शिबिर यशस्वीरित्या संपन्न

सातारा जिल्ह्यातील निवासी क्रीडा प्रशिक्षण शिबिर यशस्वीरित्या संपन्न

कुंभारोशी प्रतिनिधी :

सातारा जिल्हा परिषद व मानदेशी फाउंडेशन यांच्या संयुक्त विद्यमाने आयोजित करण्यात आलेले १० दिवसीय निवासी क्रीडा प्रशिक्षण शिबिर यशस्वीरित्या संपन्न झाले आहे. म्हसवड येथील मेगासिटी परिसरात दि. २६ जुलै ते ०४ ऑगस्ट २०२५ या कालावधीत पार पडलेल्या या विशेष शिबिरामध्ये जिल्ह्यातील विविध तालुक्यांतील जिल्हा परिषद शाळांतील निवडक विद्यार्थ्यांनी सहभाग नोंदवला.

शारीरिक व मानसिक क्षमतेचा बहुआयामी विकास

या शिबिरात विद्यार्थ्यांना केवळ शारीरिक प्रशिक्षणच नव्हे, तर आहाराचे महत्त्व, मानसिक स्थैर्य, संघभावना, खेळातील शिस्त आणि नेतृत्वगुण यांचाही

प्रत्यक्ष अनुभव देण्यात आला. प्रशिक्षकांनी विद्यार्थ्यांचे कौशल्य अधिक विकसित करण्यासाठी विविध व्यायाम तंत्रे, खेळातील रणनीती व प्रात्यक्षिकांचे आयोजन केले.

शिबिरात सचिन तेंडुलकर फाउंडेशन आणि मानदेशी फाउंडेशन या संस्थांचा सक्रिय सहभाग लाभला. खेळातील तज्ञ प्रशिक्षक, आहारतज्ज्ञ व मानसोपचारतज्ज्ञ यांनी विद्यार्थ्यांना मार्गदर्शन करून त्यांचा आत्मविश्वास वाढवला.

महाबळेश्वर तालुक्याचा विशेष सहभाग

या शिबिरात महाबळेश्वर तालुक्यातील जि.प.प्राथमिक शाळा, कुंभरोशी येथील पाच विद्यार्थ्यांनी सहभाग घेतला, ही संपूर्ण तालुक्यासाठी अभिमानाची बाब ठरली. त्यांची निवड कौशल्य, प्रयत्न आणि क्रीडा क्षमतेच्या आधारे झाली होती. या प्रशिक्षणातून त्यांना अधिक सक्षम, आत्मभरोसेमंद आणि स्पर्धेसाठी सज्ज व्हायला मदत झाली.

समारोप सोहळ्यात विद्यार्थ्यांचा सत्कार

शिबिराच्या समारोपप्रसंगी आयोजित करण्यात आलेल्या कार्यक्रमात सहभागी सर्व विद्यार्थ्यांचा प्रमाणपत्र देऊन सत्कार करण्यात आला. विविध तालुक्यांतून आलेल्या पालक, शिक्षक व प्रतिनिधींनी उपस्थित राहून विद्यार्थ्यांचे अभिनंदन केले. आयोजक संस्थांनी यशस्वी शिबिराबद्दल समाधान व्यक्त करत, भविष्यात अशा उपक्रमांचे अधिक मोठ्या स्वरूपात आयोजन करण्याचा संकल्प व्यक्त केले 

स्थानिकांमध्ये आनंदाचे वातावरण

कुंभरोशी ग्रामस्थ, शाळा परिवार आणि तालुक्यातील लोकप्रतिनिधींनी विद्यार्थ्यांचे अभिनंदन करत, पुढील वाटचालीस शुभेच्छा दिल्या. ग्रामस्तरावरून विद्यार्थ्यांना या उपक्रमामुळे अधिक प्रेरणा मिळाल्याचे मत व्यक्त करण्यात आले.

 क्रीडा प्रशिक्षण म्हणजे केवळ स्पर्धेची तयारी नव्हे – ती व्यक्तिमत्त्व घडवणारी प्रक्रिया

या उपक्रमामुळे ग्रामीण भागातील विद्यार्थ्यांना राष्ट्रीय व आंतरराष्ट्रीय पातळीवरील क्रीडा संधींचा मागोवा घेता येईल. या शिबिराचा अनुभव त्यांच्या सर्वांगीण विकासासाठी मोलाचा ठरणार आहे.