गणेशोत्सवाच्या पार्श्वभूमीवर पोलादपूर बाजारपेठेत खरेदीसाठी गणेश भक्तांचा उत्साह

पोलादपूर / प्रतिनिधी प्रकाश कदम :

गणेशोत्सव अवघ्या काही दिवसांवर येऊन ठेपल्याने पोलादपूर तालुक्यातील बाजारपेठा उत्साहाने उजळून निघाल्या आहेत. सध्या गावोगावी चाकरमानी मंडळींचे मोठ्या संख्येने आगमन सुरू झाले असून त्यांच्या उपस्थितीमुळे खरेदीत चैतन्य आणखी वाढले आहे. रस्त्यांवर, गल्लीबोळात आणि हॉटेलांमध्ये सणाची चाहूल स्पष्ट जाणवते आहे.

स्थानिक व्यापाऱ्यांना दिलासा

गणेशोत्सवासाठी लागणारे सजावटीचे साहित्य, पूजाविधीतील वस्तू, मिठाई, तसेच घरगुती उपयोगाच्या वस्तूंच्या खरेदीला बाजारपेठेत मोठी मागणी आहे. नागरिक स्थानिक व्यापाऱ्यांकडूनच खरेदी करण्याला प्राधान्य देत असल्यामुळे किरकोळ व्यवसायिक आणि विक्रेत्यांना मोठा दिलासा मिळत आहे. “स्थानिकांकडून खरेदी करा” या आवाहनालाही लोक चांगला प्रतिसाद देत आहेत.

गौरीसणासाठी बाजार तेजीत

गौरी पूजनासाठी लागणारी फळे, फुले, हळद-कुंकू, नारळ, पाने, सुपारी, तसेच विविध सजावटीच्या वस्तूंची विक्री जोरात सुरू आहे. यंदा ओवसा असल्यामुळे महिलावर्गात उत्साह अधिक वाढला असून, महिलांची गर्दी बाजारपेठेत दिवसेंदिवस वाढत आहे. 

चाकरमान्यांमुळे गावात उत्साह

महाराष्ट्रातील विविध शहरांतून रोजगाराच्या शोधात गेलेली चाकरमानी मंडळी यंदा सणानिमित्त मोठ्या संख्येने गावात परतली आहेत. त्यांच्या आगमनामुळे गावागावात उत्साहाचे वातावरण निर्माण झाले आहे. कुटुंबियांच्या भेटीगाठींमुळे वातावरण अधिक सणाविशेष बनले आहे.

वाहतूक कोंडीची समस्या

सणासुदीच्या खरेदीमुळे मुख्य बाजारपेठेत गर्दी वाढली असून, वाहनांच्या मोठ्या प्रमाणावरील उपस्थितीमुळे वाहतूक कोंडीचा त्रास होणार आहे. पोलादपूर शहरातील मुख्य रस्त्यांवर विशेषतः  दिवसा वाहनांची मोठी कोंडी होत असल्याने नागरिक त्रस्त झाले आहेत. वाहतूक व्यवस्थापनासाठी पोलिस प्रशासनाकडून अतिरिक्त बंदोबस्त तैनात करण्याची मागणी होत आहे.

गणेशोत्सव आणि गौरीसणाच्या निमित्ताने पोलादपूर बाजारपेठेत उत्साह ओसंडून वाहतो आहे. स्थानिक व्यापारी, महिला वर्ग आणि गावाकडे परतलेल्या चाकरमान्यांच्या उपस्थितीमुळे या वर्षीचा सण अधिक रंगतदार होणार, यात शंका नाही.