कुंभरोशी येथे ‘धरती आबा जनजातीय ग्रामोत्कर्ष अभियान’ अंतर्गत आदिवासी बांधवांना विविध योजनांचा लाभ

कुंभरोशी येथे ‘धरती आबा जनजातीय ग्रामोत्कर्ष अभियान’ अंतर्गत आदिवासी बांधवांना विविध योजनांचा लाभ

प्रतापगड वार्ताहर । महाबळेश्वर

महाबळेश्वर तालुक्यातील डोंगरराईत राहणाऱ्या आदिवासी बांधवांच्या चेहऱ्यावर आनंद फुलवणारा एक महत्त्वपूर्ण उपक्रम कुंभरोशी येथे पार पडला. जिल्हाधिकाऱ्यांच्या मार्गदर्शनाखाली ‘धरती आबा जनजातीय ग्रामोत्कर्ष अभियान’ राबविण्यात आले असून, या माध्यमातून आदिवासी समाजाला विविध शासकीय योजनांचे लाभ घरपोच पद्धतीने उपलब्ध करून देण्यात आले.

शासकीय दारावर हेलपाटे मारून थकलेल्या आदिवासी जनतेला गावच्या अंगणातच सर्व योजना मिळाल्या, हीच या उपक्रमाची खरी वैशिष्ट्ये ठरली. यामुळे त्यांचा वेळ, पैसा आणि श्रम वाचले, तर आत्मसन्मानही उंचावला.

लाभांचे वाटप

या विशेष उपक्रमात वाईचे उपविभागीय अधिकारी श्री. योगेश खरमाटे यांच्या हस्ते विविध लाभांचे वाटप करण्यात आले. महाबळेश्वर वन विभागाचे अधिकारी सुनील लांडगे यांची विशेष उपस्थिती लाभार्थ्यांसाठी प्रेरणादायी ठरली.

जात आणि अधिवास प्रमाणपत्रे – २३ जात प्रमाणपत्रे, १९ अधिवास प्रमाणपत्रे

ओळखपत्रे – ५ आधारकार्ड, ७ रेशनकार्ड

सामाजिक व आर्थिक योजना – १ संजय गांधी निराधार योजना आदेश, २ गॅस जोडण्या, ४२ आयुष्यमान कार्ड, ३५ मनरेगा जॉब कार्ड, ५ बेबीकिट

कृषी व गृहनिर्माण – ३३ परसबाग किट, ८ घरकुल उतारे

अपंग कल्याण – ६ अपंग अनुदानांचे वाटप

याशिवाय ‘हरित महाराष्ट्र, समृद्ध महाराष्ट्र’ अभियानाअंतर्गत २० झाडांचे वृक्षारोपण करून पर्यावरण संवर्धनाचा संदेशही देण्यात आला.

मान्यवरांची उपस्थिती

या कार्यक्रमाला गट विकास अधिकारी, तालुका कृषी अधिकारी, तालुका आरोग्य अधिकारी, महिला व बालविकास अधिकारी, सरपंच, आदिवासी संघटनेचे जिल्हा व तालुका अध्यक्ष, नायब तहसीलदार, तलाठी, ग्रामसेवक, कृषी सहायक यांच्यासह अनेक ग्रामस्थ मोठ्या संख्येने उपस्थित होते.

भावनिक क्षण

योजनांचे लाभ मिळताच आदिवासी बांधवांच्या  चेहऱ्यावर समाधान आले. अनेक वर्षांपासून सरकारी कागदपत्रांच्या प्रतीक्षेत असलेले नागरिक आज स्वतःच्या हक्काचा लाभ हातात घेऊन सुखावले. “आमचं सरकार आमच्यापर्यंत आलं” अशी भावना ग्रामस्थांच्या चेहऱ्यावर स्पष्ट उमटली.

अभियानाचे महत्त्व

‘धरती आबा जनजातीय ग्रामोत्कर्ष अभियान’ हे केवळ योजना वाटपाचे साधन नसून, आदिवासी समाजाच्या जीवनमान उंचावण्याचे आणि त्यांना विकासाच्या प्रवाहात सामावून घेण्याचे एक भक्कम पाऊल आहे. अशा उपक्रमातून शासन व प्रशासनाचा मायेचा हात खऱ्या अर्थाने जनतेच्या खांद्याला खांदा लावून उभा आहे, असा विश्वास या उपक्रमातून जनतेला मिळाला.