लाखवड येथे श्रीराम जन्मोत्सव निमित्त भव्य अखंड हरिनाम सप्ताह; २१ ते २८ मार्च दरम्यान विविध धार्मिक कार्यक्रम
संतोष मालुसरे,
तापोळा प्रतिनिधी :
महाबळेश्वर तालुक्यातील लाखवड येथे श्रीराम जन्मोत्सवाच्या निमित्ताने भव्य अखंड हरिनाम सप्ताह आणि ज्ञानेश्वरी पारायण सोहळ्याचे आयोजन करण्यात आले आहे. हा धार्मिक सोहळा २१ मार्च ते २८ मार्च २०२६ या कालावधीत मोठ्या उत्साहात पार पडणार असून परिसरातील भाविक भक्तांसाठी हा एक मोठा आध्यात्मिक पर्व ठरणार आहे.
ग्रामस्थ मंडळ, नवतरुण मंडळ तसेच महिला मंडळ लाखवड यांच्या संयुक्त विद्यमाने हा सोहळा आयोजित करण्यात आला असून या सप्ताहात दररोज विविध धार्मिक व सांस्कृतिक कार्यक्रमांचे आयोजन करण्यात आले आहे. सकाळी काकड आरती, विष्णुसहस्रनाम स्तोत्र पठण, ज्ञानेश्वरी पारायण, दुपारचे भजन, रामकथा, हरिपाठ, सायंकाळी संत पंगत, तसेच रात्री हरिकीर्तन व जागरण भजन असे कार्यक्रम होणार आहेत.
या सप्ताहाचे उद्घाटन २१ मार्च रोजी कलशपूजन, ग्रंथपूजन, ध्वजारोहण व दीपप्रज्वलनाने होणार आहे. या कार्यक्रमाला विविध ठिकाणांहून येणारे कीर्तनकार, प्रवचनकार आणि वारकरी संप्रदायातील मान्यवर सहभागी होणार आहेत. श्रीराम कथा प्रवचन, हरिकीर्तन आणि भजनाच्या माध्यमातून भाविकांना आध्यात्मिक मार्गदर्शन करण्यात येणार आहे.
सप्ताहादरम्यान विविध दिवशी नामवंत कीर्तनकारांची कीर्तने होणार आहेत. तसेच काही मान्यवरांच्या स्मरणार्थ कीर्तन व संत पंगतींचे आयोजन करण्यात आले आहे. या कार्यक्रमात समाजातील अनेक दाते व भाविकांनी आर्थिक सहकार्य दिले असून ग्रामस्थांच्या सामूहिक प्रयत्नातून हा सोहळा आयोजित करण्यात आला आहे.
याशिवाय महिला भगिनींसाठी विशेष हळदी-कुंकू समारंभ, विविध सांस्कृतिक कार्यक्रम तसेच गावातील पदवीधर युवक-युवतींचा गौरव सोहळाही आयोजित करण्यात आला आहे. या कार्यक्रमामुळे धार्मिक वातावरणाबरोबरच सामाजिक एकोपा आणि संस्कृतीची जपणूक करण्याचा संदेश दिला जाणार आहे.
सप्ताहात कोयना विभाग वारकरी मंडळ, जगद्गुरू तुकोबाराय चॅरिटेबल ट्रस्ट, महाबळेश्वर तालुका युवा वारकरी संस्था तसेच परिसरातील अनेक भजन मंडळे सहभागी होणार आहेत. त्यामुळे आठवडाभर लाखवड परिसरात भक्तिमय वातावरण निर्माण होणार आहे.
या अखंड हरिनाम सप्ताहाला परिसरातील सर्व भाविकांनी उपस्थित राहून लाभ घ्यावा, असे आवाहन आयोजक ग्रामस्थ मंडळ लाखवड यांच्या वतीने करण्यात आले आहे.
Comments
Post a Comment